Enrico Vignati ricorda quande gh’èra i Cinema a Sant’Angel

Enrico Vignati ricorda quande gh’èra i Cinema a Sant’Angel

“Gh’èra una volta i Cinema a Sant’Angel”

Ièrun tri, dü de privàdi, la famiglia Altrocchi,  e vön d’la Cesa a l’Uratori San Luigi ale Vignole. A di’ la verità ghe n’èra anca vön a l’aperto, l’èra in curte al bar Arena.

Al Central , sül Tràge, l’èra anca un teste, cun el so’ bèl palco, e l’è riesìde a uspità anca dei bèi artisti, maghi atùri e cantanti. Me recòrdi el fiöl de Mussolini  che el fèva el giess, el magu Salamini e tanti oltri.

Tüte le volte l’èra un pienòn, e el sciur Altrocchi in biglietterie el se freghèva le man.

I film püsè bei ià pruietèun propi li, e tüta la gènte del circundàri la fèva la fila per gnì a vède.

Per i fiöi gh’èra  l’Uratòri,  al giuedì el bigliète el custèva la metà rispète ala duminica e nöme ndèveme a vède i film uèstern, e ala fen tüti föra a curìss adré tame i indiàn e i coubòi.

Anca li cul so bèl palco,  e tüti i ani gh’èra el so’ bel spetacul dei fiulén de scola, el püsè impurtante el se ciamèva “Chi l’è che la sa” propi tame quel che fèva in televisiòn Febo Conti .

Al Cinema Italia, in via Mazzini, gh’èra i film cun el divieto, quater ciàpe da guardà, robe che al di d’incö i fan per la püblicità.

Le pelicule i èrun vege, manimàn i se fermèun, e da in funde ala sala te sentivi una persuna, che disèva a squarsagula: “Altrochi, lašaruni!!”.

L’èra  la vuš del por Bertòn.

Pö i tempi i èn cambiadi, i han dervide tüte inturne multisale atresàde, gh’èra tropa cuncurènsa e la gènte sèmper cun püsè pretèse.

Prima vön e dopu l’olter  iàn saràde sü i batènti, gh’èra  pü gnèn da sgandulà, se püdèva pü ‘ndà avanti.

Certu, a nöme ghe despiàš, perché li ème pasàde dei mumènti propi bei, da fiulén e da giuinòti n’ème viste e n’ème fai, ma se sa che gh’è el prugrès, e le robe i van avanti.

Se però me volti indré, me se acorgi tropu spèss che l’èra  mèi prima de adèss.


Enrico Vignati

Foto di copertina tratta da "Il Ponte Notizie"


 

Condividi l'articolo su

Riproduzione Riservata